Brjóstsykursgerð á Menningarnótt 2008

Viltu sjá brjóstsykur búinn til og fá að smakka?

Á laugardaginn verður Guðlaug frá nammiland.is í húsakynnum JCI við Hellusund 3, 101 Reykjavík. Þar ætlar hún að laga brjóstsykur og leyfa gestum og gangandi að smakka nýgerða, gómsæta mola auk þess sem hægt er að sjá allt ferlið. Heimalagað slikkeri svíkur engann!

Hvenær: Laugardaginn 23. ágúst frá 14:00-16:00
Hvar: JCI Húsinu, Hellusundi 3, 108 Reykjavík
Kostar: 0 kr

Búist við 100 þúsund gestum

Menningarnótt

Líkt og ég minntist á í færslunni á undan þá verður nóg að gera hjá mér á menningarnótt, 10km um morguninn, brjóstsykursgerð í JCI húsinu um daginn, taka á móti fólki í JCI húsinu og svo afmæli um kvöldið.

Ég vil minna á og benda á þennan áhugaverða dagskrárlið :
Brjóstsykursgerð
Sýnd verður brjóstsykursgerð í JCI húsinu við Hellusund kl. 14:00, 14:30, 15:00 og 15:30 og verður hægt að smakka á nýlagaðri afurðinni :)

JCI er svo með opið hús frá 13 - 22 þennan daginn og verð ég á staðnum frá 14 og eitthvað frameftir.

Sjáumst

Mikið í gangi

Um síðustu helgi var starfsmannaútilega Mentis sem ég sá um að skipuleggja í einu og öllu :) Bara gaman. Þeir sem þekkja mig vel vita að mér finnst fátt skemmtilegra en að skipuleggja viðburði og það var bara gaman að koma þessu öllu saman. Einu "mistökin" sem ég kannski gerði var að vera bara með leiki sem tóku líkamlega á.. þ.e. mikil hlaup o.þ.h. - fórum í pokahlaup, sto, ratleik (þar sem gilti að vera sem fljótastur) og svo í fótbolta með sérstökum gleraugum sem gerði manni erfitt fyrir. En jæja, á milli þessara leikja fékk fólk nú að slaka á og tala saman og skoða svæðið. Allavega ekki of mikil dagskrá :) En þessi útilega var bara snilld og Tryggvi snilldarkokkur gerði góða hluti á grillinu. Partýtjaldinu var tjaldað þrisvar þegar við mættum á svæðið - fyrst þegar við reistum það kom í ljós að þakið var öfugt (stögin voru innan á). Í annað skiptið sem við reistum það kom í ljós hvar súlurnar sem gengu af áttu að vera. En í þriðja skiptið gekk allt upp og reist var fínt 20m2 partýtjald. Á laugardagsnótt þegar flestir voru að fara lögðust allir á eitt og hjálpuðust að við að taka það niður og það var bara enga stund gert. Við vorum svo komin heim um hálftvö-tvö leytið aðfararnótt sunnudags. Já það var barasta alveg ágætt að vakna heima á sunnudag og taka þvílíkan letidag. Annars mæli ég eindregið með Útilífsmiðstöð skáta við Úlfljótsvatn - virkilega flott svæði!

Næstu helgi er svo menningarnótt og ætla ég að taka þátt í henni meira en nokkurntíma áður. Ég ætla að byrja á því að hlaupa 10km í maraþoninu og kl. 14 ætla ég í JCI húsið í Hellusundi 3 og sýna brjóstsykursgerð frá 14-16. Eftir það mun ég svo líklega hjálpa til við veitingasölu o.þ.h. í JCI húsinu. Um kvöldið er svo búið að bjóða okkur í afmæli sem ég mæti líklegast í og er svo planið að enda kvöldið á flugeldasýningunni. Þetta verður alveg frábær dagur - hlakka til :-)

nammiland.is

Allt að verða klárt fyrir Nammiland.is. Nú er hægt að fara á nammiland.is en þar er til að byrja með upplýsingar um hvernig hægt er að skrá sig á námskeið í brjóstsykursgerð. Síðan opnar svo formlega 29. ágúst með pompi og pragt og þá verður hægt að versla allt tengt brjóstsykursgerð þar.

Já, fyrir þá sem ekki vissu þá er ég s.s. að opna heimasíðu þar sem hægt verður að kaupa allt til brjóstsykursgerðar (hráefni, tæki og tól), fá upplýsingar um námskeið, skrá sig á póstlista, nálgast gómsætar uppskriftir o.fl. Mjög spennandi. Ég er þegar búin að halda nokkur námskeið sem hafa heppnast mjög vel og fólki hefur líkað það vel, enda er þetta mjög skemmtileg iðn - og gómsæt.

Clapton, Gay pride og fatamátun

Faðir minn og eiginkona fóru á Eric Clapton á föstudagskvöldið og bauð ég systrum mínum því gistingu það kvöldið svo hjónakornin gætu tekið því rólega og vaknað þegar þau vildu á laugardag. (Nei ég fór s.s. ekki á Clapton). Við systurnar og Tryggvi áttum góða stund hér á föstudagskvöld og á laugardag fórum við systur ásamt Þurý að fylgjast með Gay pride göngunni. Við fundum okkur góðan stað uppi í tröppum hjá Tíu dropum þar sem við sáum ágætlega vel og fylgdumst svo með göngunni fara framhjá okkur. Við röltum svo niður á Arnarhól þar sem við settumst niður og fylgdumst með nokkrum skemmtiatriðum sem ég get ekki sagt að hafi höfðað mikið til mín. Allavega ekki það sem ég sá því við fórum áður en allt var búið. En gangan var ágæt. Ég skilaði svo stelpunum af mér og hélt heim á leið.

Í gærkvöldi gerði ég svo yndilega skemmtilega uppgvötun. Tryggvi var að máta einhver föt til þess að finna út hvað passar á hann þessa dagana og ég ákvað að gera það líka. Og mér til mikillar undrunar var bara alveg heilmikið sem ég komst í og heilmikið sem er stutt í að passi fínt. Ég fór m.a. í jakka sem ég keypti of lítinn og hef aldrei getað hneppt en nú gat ég hneppt honum. Vantar bara örltíð upp á að ég geti farið að vera í honum. Svo var þarna dragt sem mamma gaf mér sem ég hef heldur aldrei getað verið í og það er örstutt þar til ég get farið að vera í henni. Hún var bara pííínulítið þröng núna. Og svo er hvíti jakkinn sem ég keypti í fyrra og hefur alltaf verið svolítið þröngur orðinn rosalega fínn núna! Og flauelsjakkinn sem ég keypti fyrir 3 árum síðan (var fínn þá en hefur verið of lítill síðan) var mjög fínn á mér núna....

Þetta er miklu skemmtilegra heldur en að stíga á vigtina og gerir þetta miklu raunverulegra :-)

Ég verð vitrari með hverjum deginum sem líður

Þar sem ég er farin að hreyfa mig meira og meira þá hlít ég að verða orðin bráðgáfuð á endanum :) Ekki slæmt

Líkamsrækt verndar heilann

Fuglinn kominn með egg

She-Ra er þokkalega búin að vera á þörfinni undanfarið og við höfum gert eins og stendur í bókinni - hunsað hana þegar hún er að reyna við okkur.. s.s. ekki samþykkt þessa hegðun.

Svo í fyrradag sá ég allt í einu að hún var búin að verpa einu eggi, og í gær var annað egg búið að bætast við. Verður spennandi að sjá hvort fleiri verða búin að bætast í hópinn.

Jú, She-ra er fugl einsamall og hún hefur ekki verið með neinum kalli svo engir ungar eru í eggjunum. Þetta er mjög eðlilegt hjá fuglum og það eina sem við getum gert í þessu er að leyfa henni að vera í mömmuleik, liggja á eggjunum sínum þar til hún fær leið á þeim. Og auðvitað passa upp á að hún sé að fá alla þá næringu sem hún þarf á að halda þar sem mikil orka fer í þessa eggjaframleiðslu. Ef við tækjum eggin strax af henni þá myndi hún bara verpa fleiri eggjum og það getur valdið enn meira orkuleysi og næringarskorti og jafnvel einhverju sem kallast "egg binding" þar sem egg festast í henni.

Svo næstu daga og jafnvel vikur er fuglinn minn í mömmuleik með litlu sætu eggin sín. Vonandi gengur bara allt vel hjá henni og hún fær bara leið á eggjunum og það verður ekkert mál :)

Súludansmær

Þann 8. september mun ég hefja nám í súludansi. Þó ekki til þess að stunda þá iðn á Goldfinger eða öðrum þannig stöðum heldur til þess eins að koma mér í form á skemmtilegan máta :-) Pole fitness er jú það heitasta í dag... en ég hef nú reyndar ekki verið þekkt fyrir að elta það heitasta eða það sem er mest í tísku. Nei þetta er bara svo spennandi plús ég hef einu sinni fengið að prófa (stelpuóvissuferð í vinnunni) og þá sá ég hvað þarf svakalegan kraft í líkamann og vera liðug til þess að gera þetta. Eftir að hafa prófað þetta þá öðluðust súludansmeyjar mína virðingu. Þetta verður heljarinnar púl þrisvar í viku í vetur og með þessu mun ég halda áfram að stunda mitt hlaup.

Hlaupin ganga annars nokkuð vel. Fór t.d. 5km í gær á 38 mín, innifalið í því er upphitun og smá teygjur eftir upphitunina.. Hreyfði mig líka í morgun þar sem ég kemst ekki í hádeginu í dag. Nýtt plan er nefnilega að fara á hverjum degi í hádeginu og svo þegar ég get heima á brettið eftir vinnu (get það t.d. ekki í dag og gat það ekki í gær)..

Ég er bara orðin húkt á hreyfingu :D

Hitt og þetta

Helgarskýrsla.. 

Verslunarmannahelgin er búin að vera fín. Hún byrjaði reyndar ekki skemmtilega, ég ákvað að vinna heiman frá mér á föstudaginn sökum mikilla verkja (verki sem karlmenn þurfa aldrei að ganga í gegnum...). Þeir voru eitthvað ferlega slæmir hjá mér þennan mánuðinn svo ég ákvað að vinna heima fyrst ég get það. Og það gekk bara fínt. Sko að vinna heima. Það er samt ferlega lýjandi að vinna heima - betra að geta farið út af heimilinu til að gera það og geta svo komið heim eftir vinnu og skilið hana eftir þar. Annars endaði föstudagurinn bara í tiltekt hérna heima.

Á laugardaginn var svo gestagangur allan daginn. Á hádegi komu Bjarkey og Þurý til mín í brunch og brjóstsykursgerð sem var mjög fínt. Við gerðum hindberjabrjóstsykur, lakkrísbrjóstsykur og svo fór sköpunargleðin í gang, bleikur fylltur súr sítrónubrjóstsykur og svo tvílitur grænn og appelsínugulur karamellu og lakkrísbrjóstsykur. Hann var soldið spes. Það var líka mjög spes að borða bleikan súran brjóstsykur, heilinn var ekki alveg að meðtaka tenginguna á milli bragðs og litar. Soldið fyndið. En þetta var fínn undirbúningur fyrir námskeiðin á miðvikudag og fimmtudag.

Um kvöldið komu svo aðeins fleiri, Siffi bættist í hópinn sem og Guðrún og Siggi og var "fírað upp" í grillinu og kom hver með sitt á grillið. Ég eldaði mér þessa fínu nautasteik og Þurý hafði keypt sér hrefnusteik. Eitthvað sem ég er alveg til í að prófa meira af, fékk bita og hann var þvílíkt góður! Svo var setið að sumbli frameftir kvöldi og spilað Uno og Jungle Speed. Við ákváðum að Jungle Speed væri skemmtilegt spil en ekki nógu gott spil með drykkju því það gafst enginn tími til hennar. Uno-ið hentaði betur sem drykkjuspil :-P

Daginn í dag tók ég bara rólega, tók til eftir partý gærkvöldsins, fór að hlaupa, byrjaði loksins á málverkinu hennar mömmu, kíkti yfir til Guðrúnar og Sigga og horfði á X-files myndina með þeim (sem ég mæli ekkert sérstaklega með) og á morgun ætla ég að hjálpa mömmu að hengja upp myndir og elda handa henni góðan fiskrétt.

Jamm, fínasta verslunarmannahelgi :-)

Eitt að gera sjálfum sér þetta

..en að gera öðrum sem geta ekkert við því gert að hugsa ekki um heilsuna þeirra.. það skil ég ekki.

 Ég á fugl og ég vigta hann reglulega, hann er alltaf í kringum 94-98 grömm og hefur haldist í þeirri þyngd í töluverðan tíma, enda alinn á góðu fæði. Ef hann fer að þyngjast sker ég út feitu kornin - en hingað til hefur ekki komið til þess.

Það eru ekki allir sem vita það en ein helsta dánarorsök gælufugla er einmitt slæmt mataræði og ekki nógu fjölbreytt. Fólk heldur kannski að það sé allt í lagi, fuglinn er að borða kornið sem var keypt í gæludýrabúðinni en málið er að mikið af því korni er bara ekki nógu gott auk þess sem fuglarnir eru gjarnir á að velja úr korninu. Fólk heldur að hann sé að borða vel því það er mikið af hýði en ef vel er að gáð eru þetta oft hýðið utan af "óholla" og feita korninu. Auk þess þurfa fuglarnir að fá fjölbreyttara fæði eins og ávexti og grænmeti.

Gott próf til að athuga hvort fuglafæðið er gott er að taka nokkur korn og rækta í bómull (eins og maður gerði í grunnskóla). Ég hef reyndar ekki gert það sjálf en vinkona mín hefur borið saman fæðið þaðan sem við kaupum það (hjá Tjörva í Furðufuglar og fylgifiskar) við fæði úr gæludýraverslun og fæðið frá honum Tjörva spírir mun betur. Sem þýðir að það er hollara og næringarríkara.

Vaxandi offita íslenskra gæludýra